Тәуелсіздік құрдасы
Тәуелсіздіктің түйдей құрдастары «Тәуелсіздік» ұғымының мән-маңызын біркісідей біледі, еліміздің мерейін асыру жолында өздеріне жүктелетін жауапкершіліктің зор екенін жете түсінеді. Ақ халатты абзал жан, Ажар Абжанова да егемендікті ешбір дәлелді қажет етпейтін аксиома деп санайды. Медицина саласына ерекше ден қойған білікті маман Петропавл қаласындағы №3 қалалық емханада 7 жыл бойы еселі еңбек етіп келеді. Егемендіктің елең-алаңында Аққайың ауданында дүниеге келген ол, бүгінде талай науқастың сырқатынан құлан таза айығуына сеп болды.
АЖАР АБЖАНОВА, № 3 ҚАЛАЛЫҚ ЕМХАНАНЫҢ ЖАЛПЫ ТӘЖІРИБЕЛІК ДӘРІГЕРІ:
Мұқағали Мақатаев айтқандай, Мейлі мені шығарсың шырқ қылып, Мейлі мені тастасын лақтырып, Отанымды сүйемін күліп тұрып, отанымды сүйемін жылап тұрып. Мен де Отанымды, өз туған жерімді мақтан тұтамын, сүйемін.
Тәуезсіздік таңымен таласа туып, еркін қоғамда бой жеткен маман бала кезінен ақ халат киіп, әкесі мен анасы сияқты денсаулық сақтау саласында еңбек етуді армандаған. Өз арманына қол жеткізу үшін ол 2009 жылы еліміздің көптеген мықты дәрігерлерін даярлаған Қарағанды Мемлекеттік медицина университетіне оқуға түседі. Осы оқу орнын 2016 жылы аяқтап, өз туған жеріне оралады. №3 қалалық емханада алғашқы еңбек жолын бастайды. Өзі мол тәжірибе жинақтап, дамудың түрлі сатысынан өткен осы мекемеде қазірге дейін аянбай қызмет атқарып келеді.
АЖАР АБЖАНОВА, № 3 ҚАЛАЛЫҚ ЕМХАНАНЫҢ ЖАЛПЫ ТӘЖІРИБЕЛІК ДӘРІГЕРІ:
Тәуелсіздік күні қарсаңында барлық қазақстандықтарға зор денсаулық, қажымас қайрат, талмас қанат, өмірдің аяулысын, бақыттың баяндысын тілеймін. Еңбектеріңіз жемісті, аспанымыз ашық болғай.
Дәрігер, Ажар Абжанованың айтуынша, бүгінде емхана цифрландырудан өткен, соның арқасында бұрынғыдай ұзын-сонар кезек жоқ. Мұндағы айтулы жетістіктің бірі, диспансерлік карта арқылы дәрігерлер бақылау жасап науқастардың бұдан бұрын қай маманның қабылдауында болғанын, қайда қаралғанын да біле алады. Осы мекеменің алға жылжуына септігін тигізіп жүрген тәжірибелі маманның үлкен ұлы да болашағын медицинамен байланыстырғысы келеді, болашақта ол тіс дәрігері болуды армандайды.
14.12.2023
Қараулар: 2069